曾經，我們差點以為，明星偶像都是天賦異稟，其完美程度，應該等同神。或至少，接近聖人。
從年輕偶像口中說來，食煙飲酒夜蒲，是「十惡不赦」。明愛暗戀也好，同屬「罪大惡極」。否則，他們怎會只願跟我說「puppy love」，還匆匆用兩句交代，再向旁邊的工作人員，投以求助眼神。我慚愧，因為差不多「壞事做盡」。直至有一天，我跟閣下一樣，從報章雜誌電視上發現，以上種種原是等閒。更嚴重的，叫刑毀藏毒搶人老公打記者。
或許，我們都錯了。揭露真相，從來就比粉飾太平，來得血肉橫飛。
不過，出道已差不多兩年的衛蘭（Janice），今日還願跟我提舊事，「我記得十六歲個時，Daddy唔畀我拍拖，仲打我，我同佢反面，仲離家出走，去朋友屋企住左幾日。你有無試過呀？」才廿四歲的青春偶像，跟你分享這種反叛事，老實說，有點感動。重聽訪問錄音，記下Janice跟Daddy如何鬥氣，與妹妹衛詩（Jill）怎樣互相掩護的點點滴滴，還是會忍不住，再次發出會心微笑。「好慘呀！驚畀人影，無得蒲呀！」錄音機中傳來，帶重鼻音的嬌嗔，教我憶起 Janice說時扁扁嘴的慘樣。真說話，原來比俏臉，還要永遠。
買了衛蘭的新碟沒有？這篇不是廣告，只為提提你，碟中第一隻歌便叫〈離家出走〉。人紅，總有道理。
皮帶
出道以來，衛蘭常說自己天生樂觀，即使菲律賓裔父親跟中韓混血兒母親早早離異，也不影響她。仍然活得快樂，相信愛情。的確，Janice在訪問拍照中，都是跳跳紮紮，玩扭計骰也可緊張得尖叫，笑得比她手中的可樂，還要甜。就算曾經離家出走，聽起來，也不憤世嫉俗，只像上了課「家庭教育」。
「我Daddy係好傳統既菲律賓人，好嚴囉！我同妹妹日日放學，都要即刻返屋企練歌一個鐘，有次同朋友去公園玩，七點先返屋企，佢就攞住條皮帶，係門口等我，差唔多想打我咁滯，好驚呀！佢話你地跑得入間房，就唔打你！嘩！我同妹妹一齊跑入房，不過都打到少少啦！其實，Daddy都係嚇纒我懐。
「逢有男仔打電話黎屋企搵我，Daddy仲一定『吸』線，『哈囉』都唔講。不過，十六歲個年，我都係鍾意左一個男仔。佢好靚仔，頭髮少少長，係美國移民，返左香港玩。初時我唔知佢鍾意我架！因為個時好肥（有多肥？）超肥！總之肥過依家好多啦！所以，我覺得好奇怪，點解佢既taste咁差？我諗，佢係咪玩我架？
「但後來發覺，佢真心喎！所以，好開心，好難得有男仔鍾意自己！最慘個時無手提電話，日日係屋企同佢傾電話畀Daddy發覺左，『炒』得好犀利，Daddy真係用皮帶打我，手腳瘀晒，我嬲到同Daddy反面，去左朋友屋企住幾日。不過，男朋友唔知點解好尊重我Daddy，佢打電話去屋企，叫Daddy唔好嬲，講左好多野。結果，Daddy原諒左我，我返去屋企。雖然佢只係大我兩歲，但真係好好，好成熟，好sweet！依家我地仲有e-mail聯絡，唔係情侶，都做到朋友。
「其實，係呢段時間都辛苦左阿Jill（衛詩），我打畀佢，叫佢幫我話畀Daddy聽，自己住係朋友屋企，唔使擔心。阿Jill就同我講，Daddy好擔心你，家姐快D返黎！我聽到呢句說話都好開心，at least，覺得Daddy有擔心我囉。」
幫凶
「所以，我地兩個係好拍檔，互相幫大家，由細到大都係咁。以前細個，Daddy會打電話返屋企check我地有冇出街，但有時可能撞正阿Jill出夜街。好彩我同佢把聲好似，可以扮佢囉。Daddy話：『畀個電話你細妹聽啦！』我就將個電話筒右手交左手，『喂喂！我訓緊覺呀……』真係口架！（笑）我會扮佢既語氣，同佢頂住，Daddy都聽唔出。
「邊有人細個唔鍾意出街玩？我都鍾意玩。不過，依家無呀！好慘呀！無得蒲呀！譬如錄完音、做完野之後，都唔玩得喎。因為驚破壞形象，因為D人認為女仔去蒲，實係衰啦！但都唔係啫，出去都係想跳舞，無其他原因口架！點解大家都要諗錯隔籬呢？所以，公司搞party，我會好開心。哈哈！因為有藉口玩！
「不過，入左行，我覺得自己大個左，尤其同妹妹搬出黎住，我會照顧佢。我好擔心屋企有無廁紙？有無飯食？有無水呀？日日check，仲會煮飯畀妹妹食，好簡單啫，都係煮D飯同韓國湯。仲有水費、電費、電話費好多好多，都係我負責。不過無所謂，我明白妹妹仲係新人，等佢儲多D錢先，我知以後佢會幫我既。
藉口
「不過Daddy好搞笑。自從我地搬左出去，佢成日搵D藉口叫我地返去。成日話：『唉呀！我好唔鍾意呢度（與衛蘭姐妹倆住了多年的舊居），我可唔可以同你地一齊住呀？』我地就話：『Daddy，搬出去都未夠一個月，你畀D時間我地試下獨立啦！』但佢以前都無投訴過，依家就話黃埔好迫好唔舒服呀！好明顯，佢係好掛住我地。不過，唔緊要，我諗住大個左，儲多D錢，買間大屋畀我地一齊住，或者我地住上面，佢住下面。
「但離目標仲有好遠呀！點算？我成日都擔心佢退休唔知點，我想畀多D保障佢囉。要出多D function，拍多D廣告，其實拍廣告既錢，係多過賣唱片既錢，所以唔可以剪短頭髮，要keep住個樣口架！呢D都要計埋……」難怪今天的衛蘭就只剪了個齊蔭，說要日日敷面，還望了數十次鏡子。
徐小鳳
其實，衛蘭有理由比現在更貪靚的，因為她有個中韓混血，經營美容生意的貴氣媽咪。聽Janice說，伯母的髮型像徐小鳳，一絲不苟。身為女強人的她，經常韓、日兩地飛，都用電話跟女兒相連。
「你知唔知？好奇怪，我媽咪一次都未聽過我唱歌。我有寄自己既碟畀佢聽，但因為係中文，我估佢都唔會聽，媽咪聽英文、韓文歌多，而且佢唔係好鍾意音樂。Daddy就唔同，佢好love音樂，係音樂人（酒廊歌手）。
「初時，媽咪係好反對我入行，因為佢以前一直寄錢過黎，畀我同妹妹讀好好既國際學校，想我地讀多D書，做秘書、醫生，點知Daddy就叫我地讀完中學，停落黎，專心練歌，佢好有信心，我地可以做到歌手。所以，真係激死媽咪。（喜歡唸書，還是唱歌多點？）我諗我兩樣都鍾意，只係太細個開始唱歌喇，真係好享受係人地面前表演既感覺。未入行前，我唔收錢都會去人地個婚禮上唱歌，又不斷寄Demo畀香港同日本既唱片公司，但一直無回音。唔知點解，我都無放棄，Daddy都無，雖然我依家聽番以前既Demo，真係嚇死人架，哈哈哈哈！（媽媽現在接受你當歌手嗎？）
「我諗接受左囉，因為我講畀佢聽自己去紐約拍野，又出碟，佢都會聽。我又畀自己拍廣告既相佢睇，佢就即刻擺係自己個鏡隔籬，攝入去……」
怎說，也是血脈相連。
肥?
坦言往事，是勇氣，也是豁達的表現。然而，有些東西，卻比往事更不堪回首，只想終生滅絕，不讓它暴露人前。
「係呀！好慘啊！成日要減肥，我好為食口架。不過，最近減左少少啦，但都係要減多D。唉……（嘟嘴皺眉）驚畀人鬧，驚畀人講。（入行以來，減肥是最大壓力？）係呀！點解咁難既……（壓力比唱歌更大？）係呀！哈哈哈，減肥大D。成日食幾啖就發覺，唔得呀，唔可以再食。好慘呀！食幾啖，就已經覺得自己好肥喎，幾奇怪呀！（跟妹妹衛詩是互相鼓勵對方減肥，還是彼此縱容？）
「除左我同事之外，妹妹一定會拎D野畀我食，佢會話：『唔緊要啦！食少少啦！你都唔肥。』好搞笑口架！哈哈哈哈……」
的確，妹妹衛詩今天不在場，Janice面對工作人員及記者如我，只吃了一小粒牛柳、一隻雞翼，可樂也沒敢多喝兩口。捱至訪問中途，才忍不住拿出自己買來的一包最最普通的檸檬夾心餅，咬一口，笑著引誘：「你食唔食呀？好好味口架！」我意志薄弱，一口氣連吃兩片，跟Janice對望一眼，再齊聲呼叫：「唉！減肥呀！」
脂肪啊，原是生命最不能承受的重。
沒有留言:
張貼留言